علقت الإعلامية ياسمين عز على انفصال نيللي كريم عن زوجها هشام عاشور، وذلك خلال تقديم حلقتها ببرنامج كلام الناس على قناة mbc مصر.
وقالت: النهاردة من دقايق النجمة انتشرت أخبار عن طلاق نيللي كريم وهشام عاشور، ودايمًا وطول الوقت مش بحب أقول أخبار طلاق، ومش بحب نكون طرف فيها.
للخبر بقية في الأسفل.. ومن أخبارنا أيضاً:
وتابعت: عاوزة أقول إن حياة الفنان أو الشخصية العامة مش خاصة، والناس هتفضل تفتش وتحب تسمع أخبارك سواء اتجوزت أو اتطلقت، وأتمنى نقف عن إعلان الطلاق ومالناش دعوة بقى بأسباب الطلاق، مالناش علاقة مش موضوعنا ومش قصتنا، وربنا يقدم لهم اللي فيه الخير.
وأضافت: ناس كتير بتتجوز وتطلق، ويستوقفني أن محدش بقى بيعمر ودي من المؤشرات الخطيرة في المجتمع، وكل واحدة تحافظ على جوزها لأن مؤخرًا محدش بيعمر مش عارفين ده بسبب عين ولا حسد.
وأختتمت: دايمًا الشخصيات العامة والمشاهير اللي بيوروا حياتهم للناس مابيعمروش، فلازم تبقى خبيث في حياتك الشخصية، عشان تعمري مع جوزك سواء شخصية عامة أو مش عامة، داري على جوزك وداري على جوزك وبيتك ومتنشريش ومتعلنيش وماتبينيش إنك سعيدة، اتخابثي يا مدام عشان العواقب مش سليمة.
وكانت أعلنت الفنانة نيللي كريم، انفصالها عن زوجها هشام عاشور،بعد زواج دام عامين ونصف، وذلك خلال تصريحات صحفية.
وقالت: الخبر حقيقي وكل شيء قسمة ونصيب.
يذكر أن أخر أعمال الفنانة نيللي كريم، مسلسل "فراولة"، بطولة كلا من: الفنانة نيللي كريم، علا رشدي، شيماء سيف، أحمد فهيم، صدقي صخر، دنيا سامي، توني ماهر، جيلان علاء، سمر مرسي، حجاج عبد العظيم، تأليف محمد سليمان عبد المالك، إخراج محمد علي.
